ܫܡܸܥܠܘܼܟܼ ܡܸܢܕܝܼ ܒܘܼܕ ܕܗܵܘ ܙܲܒܼܢܵܐ
ܕܐܵܢܝ݇ ܓܲܢ݇ܒܵܖܹ̈ܐ ܕܠܵܐ ܗܵܘܢܵܐ
ܓܒܼܘܿܖܹ̈ܐ ܐܝܼܢܵܐ ܒܠܸܒܵܐ ܙܥܘܿܖܹ̈ܐ
ܪܸܚܩܵܐ ܡ̣ܢ ܡܵܪܝܵܐ ܐܲܠܵܗܵܐ
ܢܘܿܚ ܓܲܒܼܪܵܐ ܡܗܲܝܡܢܵܐ ܝܗ݇ܘܵܐ
ܩܵܬܹܗ ܡܵܪܝܵܐ ܐܵܡܹܪ ܗ݇ܘܵܐ
ܐܵܢܵܐ ܒܥܵܒܼܕܸܢ ܛܵܘܦܵܢܵܐ
ܩܘܼܡ ܒܢܝܼ ܠܘܼܟܼ ܐܸܠܦܵܐ ܥܲܫܝܼܢܵܐ
ܙܵܘܓܹ̈ܐ ܙܵܘܓܹ̈ܐ ܡܚܲܝ̈ܘܵܬܵܐ
ܐ݇ܬܹܐ ܠܲܝܗܝ ܠܐܸܠܦܵܐ ܒܚܹܐܪܘܼܬܵܐ
ܡܗܲܝܡܘܿܢܹܐ ܝܘܸܢ ܒܗܵܘ ܡܵܪܝܼ
ܒܸܕ ܢܵܛܹܪ ܩܵܬܝܼ ܒܲܝܬܝܼ
ܐܲܪܢܒܼܵܐ ܟܹܐ ܡܬܲܪܩܸܕ ܗ݇ܘܵܐ
ܘܢܸܡܪܵܐ ܟܹܐ ܪܵܚܹܛ ܗ݇ܘܵܐ
ܩܪܵܝܵܐ ܪܫܸܦܠܹܗ ܒܫܸܠܝܘܼܬܵܐ
ܐ݇ܙܸܠܠܲܝܗܝ ܢܝܼܚܹ̈ܐ ܕܠܵܐ ܙܕܘܿܥܬܵܐ
ܩܸܪܕܵܐ ܘܥܲܡܹܗ ܙܲܪܝܼܦܵܐ
ܐٔ݇ܙܸܠܠܲܝܗܝ ܙܵܘܓܹ̈ܐ ܠܗܵܘ ܐܸܠܦܵܐ
ܘܛܲܝܖܹ̈ܐ ܒܪܹܫܲܝܗܝ ܒܸܙܡܵܪܵܐ
ܘܓܵܘ ܫܡܲܝܵܐ ܒܸܚܕܵܪܵܐ
ܙܵܘܓܹ̈ܐ ܙܵܘܓܹ̈ܐ ܡܚܲܝ̈ܘܵܬܵܐ
ܐ݇ܬܹܐ ܠܲܝܗܝ ܠܐܸܠܦܵܐ ܒܚܹܐܪܘܼܬܵܐ
ܡܗܲܝܡܘܿܢܹܐ ܝܘܸܢ ܒܗܵܘ ܡܵܪܝܼ
ܒܸܕ ܢܵܛܹܪ ܩܵܬܝܼ ܒܲܝܬܝܼ
ܐܘܿ ܙܥܘܿܖܹ̈ܐ... ܥܪܹܐ ܗ݇ܘܵܐ ܠܵܗ̇ ܡܸܛܪܵܐ ܪܵܒܵܐ ܚܲܝܠܵܢܬܵܐ ܘܟܠܲܝܗܝ ܛܘܼܖ̈ܵܢܹܐ ܛܒܸܥ ܗ݇ܘܵܘ ܠܲܝܗܝ ܬܚܘܿܬ ܡܲܝܵܐ، ܘܟܠ ܡܸܢܕܝܼ ܓܵܘ ܒܪܝܼܬܵܐ ܐ݇ܙܸܠܠܹܗ. ܐܝܼܢܵܐ ܐܲܠܵܗܵܐ، ܢܛܸܪܹܗ ܠܢܘܿܚ ܘܒܲܝܬܘܼܬܹܗ ܘܚܲܕ݇ ܙܵܘܓܵܐ ܡ̣ܢ ܟܠܲܝܗܝ ܚܲܝܘܹ̈ܐ ܕܐܲܪܥܵܐ.
ܐܲܠܵܗܵܐ ܥܲܡ ܢܘܿܚ ܪܚܸܫܠܹܗ
ܘܐܝܼܕܹܗ ܒܐܝܼܕܵܐ ܕܢܘܿܚ ܕܒܼܸܩܠܹܗ
ܒܗܲܝܡܵܢܘܼܬܵܐ ܕܢܘܿܚ ܩܸܘܝܵܐ
ܡܬܘܼܡܸܡܠܵܗ̇ ܐܘܼܪܚܵܐ ܕܡܵܪܝܵܐ
ܡܗܲܝܡܸܢ ܟܡܵܐ ܕܗܵܘܹܐ ܥܘܼܡܪܘܼܟܼ
ܘܲܒܐܘܼܪܚܵܐ ܕܐܲܠܵܗܵܐ ܡܵܪܘܼܟܼ
ܒܐܲܡܝܼܢܘܼܬܵܐ ܫܒܼܘܿܩ ܠܹܗ ܒܠܸܒܘܼܟܼ
ܘܠܵܐ ܡܪܲܚܩܸܢܸܬ ܡ̣ܢ ܒܵܒܘܼܟܼ
ܙܵܘܓܹ̈ܐ ܙܵܘܓܹ̈ܐ ܡܚܲܝ̈ܘܵܬܵܐ
ܐ݇ܬܹܐ ܠܲܝܗܝ ܠܐܸܠܦܵܐ ܒܚܹܐܪܘܼܬܵܐ
ܡܗܲܝܡܘܿܢܹܐ ܝܘܸܢ ܒܗܵܘ ܡܵܪܝܼ
ܒܸܕ ܢܵܛܹܪ ܩܵܬܝܼ ܒܲܝܬܝܼ
